Қысқы спорт түрлері бойынша олимпиадалық даярлау орталығы базасында парашаңғы спортынан әлем чемпионы және парабиатлоннан әлем чемпионатының жүлдегері Ербол Хамитов марапатталды. Олимпиадалық дайындық орталығының директоры Ардақ Тулендин спортшыға Алғыс хат пен естелік сыйлық табыс етті. - Шетелде бөгде елдің туы екі жағдайда ғана биікке көтеріледі. Біріншісі – Мемлекет басшысы сол елге ресми сапармен барғанда, екіншісі – аталған елдің спортшылары жеңіске жеткенде, - деді Ардақ Болатұлы. - Қазақстандық спортшылар халықаралық аренада жақсы нәтиже көрсеткенде біз қуанамыз. Қысқы спорт түрлері бойынша олимпиадалық даярлау орталығы әрдайым ҚР паралимпиадалық құрамасына қолдау көрсетіп, көмек көрсетеді. Қазіргі уақытта парашаңғы жарысы мен парабиатлоннан ұлттық құрама мүшелері Щучинск қаласында оқу-жаттығу жиынын өткізуде. Параспортшылар Әлем Кубогының соңғы кезеңіне дайындалуда.
Дайындаған: Наталья Няшина
